زيــــــدان اون لايــــــــن

المفروض إننا بعد نجاح الثورة كان عندنا أمل إننا نغير نفسنا.  وكان فيه دعوات على الفيس بوك لتغييرالشباب أنفسهم زى مثلا ميرميش زبالة، مايعاكسوش بنات، مايدفعوش رشوة وهكذا،  وكان فيه تفاؤل كبير بإننا من جوانا حنغير نفسنا علشان نقول بلد محترمة ولكن للأسف مع إن فيه فئة مثقفة بتنظف فى الشوارع وتدهن ، لسه فيه ناس بترمى زبالة وتعاكس وتتحرش وتمشى عكس فى الشوارع وتبلطج على بعض.   وأهم حاجة كنت أتمنى إن المصريين يغيروها فى نفسهم هو تشغيل عقلهم والنظر للمستقبل والإيمان بالعمل وإننا يجب أن نكون متحضرين.

للأسف لسه نفس العقلية القديمة ، ألا وهى اللى تطوله خده،  ودلوقتى ناس بتتظاهر على أى حاجة ودلوقتى اللى مش عاجبه أى حاجة (أو مش عايز يشتغل) يعمل مظاهرة.  اللى مش عاجبه مديرة يعمل مظاهرة،  اللى عايز فلوس زيادة يعمل مظاهرة.  مظاهرة على أى حاجة.   ومن المطالب مثلا لموظفين البنوك أنهم عايزين مرتبات عالية وتعيين أبناء العاملين.   طيب ما أحنا أصلا كنا رافضين مبدأ توريث الرئيس لإبنه وكنا بنشتم ونقول نكت، ونيجى إحنا نفسنا نطالب بالتوريث لأبنائنا ؟؟؟!!!   وكمان اللى عايزين مرتبات عالية دول موظفين بنوك أو شركات بترول أو حاجات تانية وبيقبضوا كويس مقارنة بالناس العادية.      الناس اللى عملت الثورة معظمهم ناس مش لاقية شغل ومش لاقية تاكل أو تصرف على ولادها ، لكن الناس اللى بتتظاهر دى أكيد ماكانوش فى الثورة ولما لقوها نحجت قالوا نطلب إحنا كمان دلوقتى ونطلب تحقيق مطالبنا حالاَ.  طيب إزاى كل حاجة تحقق دلوقتى حالاَ بعد الثورة بأيام؟

وكمان الموضة الجديدة اليومين دول الناس اللى إحتكت بالجيش يوم الجمعة اللى فات 25/2 ، وإيه دلوقتى ناس بتقول لازم نحاسب وزير الدفاع ورئيس الأركان ورئيس الوزراء و….    يعنى بعد ما الجيش كان بيحمى الناس وكان منحاز للشعب فى المظاهرات ونجحلهم الثورة وحافظ على الأمن وأعلن صراحة أنه ملتزم بتحقيق مطالب الشعب , غير كده أصدر يوم السبت 26/2 إعتذار رسمى للناس اللى إحتك بيهم (ولو إنه مش مطالب أنه يعمل كده)  يجى بعض الناس الفاضية ويقولوا نحاسب الجيش.   حاجة تقرف والله.

ياريت الناس دى تشتغل بقى وتشوف أداء الحكومة ولما تتقاعس نحاسبها مش نتظاهر وخلاص.      والمشكلة إن المدارس والجامعات كانت واقفة خلت الناس فاضية وتنزل تتظاهر وخلاص.