زيــــــدان اون لايــــــــن

يوم الجمعة اللى فات كنت ماشى بالعربية الساعة 10:30 الصبح باخلص شوية حاجات قبل الصلاة وحسيت انى جعان لانى مافطرتش ولقيت نفسى قريب من محل اخر ساعة اللى فى مدينة نصر وقفت وإشتريت ساندوتشات ولما رجعت للعربية لقيت طفل صغير ماسك فوطة وبيمسح العربيات جالىى بيمسح العربية وبعدين قاللى:   باشا  , هو البحر الاحمر ده برة مصر؟   انا استغربت من السؤال,  فرديت عليه وقلتله البحر الاحمر ده. … يعنى… جنب مصر,  بتسال ليه؟

قاللى: اصل فيه واحد قاللى تعالى اشغلك فى البحر الاحمر واركبك طيارة وحتنام وتاكل ببلاش وتبعت فلوس لاهلك كل شهر.  قلتله: يابنى البحر الأحمر ده مكان بعيد وماينفعش تروح هناك من غير أبوك ولا أمك!  أنا قلتله الكلام ده لأنى شايفه صغير وسألته إنت بتروح المدرسة؟  قاللى ايوه.  سألته: إنت فى سنة كام؟ فقاللى أنا خلصت خامسة إبتدائى!!     رحت سأله:  راجل مين اللى قالك تعال،  قاللى راجل شيخ!     طبعا فهمت منه إنه راجل مربى ذقنة يعنى مش شرط إنه يكون ملتحى أو ملتزم أو …  لكن على حسب تقديرة الطفولى إن أى واحد مربى ذقنه يبقى شيخ.   المهم قلتله يابنى ماتروحش مكان بعيد إلا لما يكون معاك أبوك أو أمك.  وبعدين ماتفكرش فى الشغل فى حتت بعيدة المهم إنك تروح المدرسة وتنجح،   رد عليا وقاللى: أه أنا نفسى أطلع ظابط  وأخويا أكبر منى مابيحبش يغيب من المدرسة خالص ونفسه يطلع دكتور.     رحت قلتله:  لما تروح المدرسة وتنجح هى اللى حتخليك تبقى ظابط وتشترى عربية وشقة.

لقيته رد عليا ببراءة وقاللى أهم حاجة إن الواحد يروح المدرسة ويبقى مؤدب.  (لفتت نظرى كلمة مؤدب دى)  وكمل كلامه وقاللى إسأل كده الناس اللى بيشتغلوا فى أخر ساعة عليا حايقولولك مؤمن ده جدع ومؤدب وعمره ما شرب سيجارة.    طبعا لأنه طفل صغير إختار كلمة سيجارة علشان يعرفنى إنه مؤدب.

قلتله: صح كده،  تبقى مؤدب وتروح المدرسة.  رد عليا وقاللى أنا السنة اللى فاتت أمى قالتلى لما تنجح عايز إيه؟ فقلتلها عايز كمبيوتر،  بس بعد ما نجحت ماجابتليش كمبيوتر بس جابتلى عجلة.  وفى السنة اللى بعدها خبت العجلة منى ومارضيتش تتطلعهالى إلا لما أنجح، ولما خلصت وجبتلها الشهادة ووريتها إنى نجحت راحت طلعتى العجلة وإديتنى عشرة جنية،  وأنا كنت فرحان جداً  وقعدت ألف بالعجلة فى كل حته وعزمت العيال كلها على أكل!!!     كمل كلامة وقاللى:  إنت عارف ياباشا، ده أنا دفعت خمسة جنيه علشان أجيب النتيجة من المدرسة ، فعملت نفسى مندهش وقلتله: ياااه خمسة جنيه مرة واحدة؟!!  قاللى أه طبعا.    وبعدين راح سألنى: مش إنت عنك إبن؟   قلتلة أه عندى إبن،  فقاللى مش إنت دفعتله فلوس علشان تجيب النتيجة؟  قلتله مش عارف أصل أمه هى اللى جابت النتيجة.  راح قاللى إيه:   مش إبنك فى مدرسة كبيرة ، قلتله: أه ،   قاللى:  مدرسة مؤدبة؟  قلتله: أه مؤدبة.     قاللى: طيب ده تلاقيه دفع تلاتين جنية.

بصراحة ضحكنى، رحت مطلع عشرة جنية وإديتهاله، راح بصلها وقاللى:  لأ،  أنا عايز جنية بس.  قلتله معلش خدها،  فقاللى أصل الراجل اللى كان عايزنى أروح معاه طلعلى عشرة جنية وقاللى خد إنت باين عليك جدع أوى ولقيته عايز ياخدنى معاه وأنا مارضتش أخدها منه وقلتله أنا عايز جنيه بس.     رحت قايله ماتخافش خدها وأنا مش حاقلك تعالى معايا،  راح  واخدها.

بعدها سألته:  إنت ساكن فين يامؤمن،  قاللى انا ساكن فى الدويقة وبركب ميكروباص من هنا بيودينى لحد هناك بجنيه.  أهو برضه أكون قريب من أمى علشان لو عزت حاجة.   وبعدين سألته هو أبوك بيشتغل إيه؟   قاللى بيشتغل فى فرن بيعمل عيش فينو وحاجات كده وساعات بياخد أخويا يعلمه.

أنا لقيت نفسى حتأخر فقلتله أنا ماشى بقى يامؤمن.  وأكدت عليه تانى: ماتروحش مع حد فى مكان بعيد إلا لما يكون أبوك أو أمك معاك،  فقاللى:  ماشى.   وقاللى: إستنى بقى لما أطلعك وقعد يشاور للعربيات علشا أطلع من الركنة زى السايس الكبير لما بيعمل وعمللى باى باى بإيده.

==========

أنا كتبت الحوار اللى حصل معاه بالظبط وبنفس الكلمات اللى قالها،  والمهم إن بالرغم من شكله المبهدل وهدومة المقطعة وشعره المنكوش لكن طريقة كلامة فيها براءة لا تختلف عن براءة أى طفل أخر ممكن تكون ظروفه أحسن.  تعبيرات وشه وصوته تنم عن طفل برىء محتاج يلعب وفى نفس الوقت أمه وأبوه معلمينه يعنى إيه واحد مؤدب (ردد كلمة مؤدب أكثر من مرة).

بعد مامشيت قعدت أفكر فيه شوية.  الولد ده لو كان فى مكان تانى مع ناس تانيه فى ظروف مختلفة كان ممكن يبقى حاجة تانيه خالص، وواضح إنه ذكى وظروفه جعلته يتحمل المسؤلية وهو فى ىالسن ده(خامسة إبتدائى ياجماعة).  بينزل من بيته ويركب مواصلات من الدويقة (طبعا للى مش عارف الدويقة دى مكان عشوائى وبعيد ومزدحم جداً) ويروح مدينة نصر ويشتغل وكمان بيعمل علاقات عامة مع الزبائن.

أنا أعتقد إن الولد ده لو (وأكيد فيه كتير زيه) لو لقى مدرسة كويسة فى دولة محترمة بتهتم بالتربية والتعليم ممكن يكون سبب فى تغيير أسرة كاملة أو حتى جيل كامل.   وعلى فكرة لازم نراجع  نظرتنا للأولاد اللى زية. هم فى الآخر أطفال زى أى أطفال نعرفها.

الحاجة الأخيرة بقى:   مين الشخص ده اللى عايز ياخد معاه طفل صغير زى ده.  طبعا مفهوم إن ناس زى دى بتستغل الأطفال فى أشياء قذرة أو غير قانونية.\