اليومين اللى فاتوا حصل كام حاجة ليها علاقة بفودافون عندنا فى الشغل وكان فيه ناس بتشتكى منها وإفتكرت موضوع شخصى حصللى مع فودافون وقلت أكتبة علشان تعرفوه و أفتكره بعد كده.
الحكاية إنى اصلا عندى خطين موبينيل وإتصالات واﻹتنين إشتريتهم من أول ما الشركتين إبتدوا الشبكة بتاعتهم فى مصر، اﻷول إشتريته فى 1997 والتانى فى 2007. المهم إنى كنت شغال باﻷثنين وماكانش عندى مشكلة و كنت شغال بيهم تجوال كمان، وفى مرة كنت أجازة فى مصر ومش عارف إيه اللى خلانى أفكر أشترى خط فودافون. المهم قلت لنفسى هات واحد فودافون إحتياطى. إشتريت الخط كارت، وبعدين حولته لفاتورة زى الخطين التانين علشان أبقى أدفع الفواتير كلها فى يوم واحد.
المهم إنى كنت أصلا مابستخدمهوش وحاطه فى تليفون قديم GPRS وماكنش فيه 3G والتليفون أصلا كان بطئ ، وفى مره حبيت أجرب اﻹنترنت عليه وكان أيامها فودافون مغرقة التلفزيون إعلانات عن إن اﻹنترنت بجنيه فى اليوم. قلت اجرب اﻹنترنت عندهم عاملة إزاى. وعملت التظبيات المطلوبة ودخلت على النت من فودافون ولقيتها زفت مقارنة بموبينيل على نفس التليفون. قلت مش مشكلة أنا بجرب بس وأنا أصلا عندى خطين.
وفى أول الشهر ياحضرات لما الفاتورة جت لقيتها على ما أتذكر معديه ال 600 جنيه. قلت إزاى وأنا أصلا لا أستخدمة. إتصلت وقلت فيه حاجة غلط وماحادش فهم وطلبت فاتورة تفصيلية قاللولى لازم أدفع 20 جنيه قلتلهم أنا عندى مشكلة وعايز أعرف سببها، قالولى لازم 20 جنية. طبعا ال20 جنيه أهم من مشكلة العميل.
ولما قرأت الفاتورة بتمعن لقيت رسوم إشتراك فى مسابقات وأخبار الكورة وحاجات إخبارية تانية. وأنا أصلا لم أشترك فى خدمة من دول- ثم أنا أصلا مابحبش الكورة أوى كدة.
الشيء الكوميدى إنى لقيت رسوم إنترنت بحاولى 400 جنيه !!!!!! ولما ركزت فيها لقيت إنى فى حوالى دقيقة عملت داونلود لحوالى 400 ميجا!!!! ولقيت إن فى سطر من السطور عملت داونلود فى ثانية واحدة 30 ميجا وفى الثانية اللى بعدها 300 ميجا. (تخيلوا السرعة الفظيعة ياجماعة – 300 ميجا فى ثانية). المهم قلت أكيد فيه غلطة ولما حأتصل بيهم حيحلوا المشكلة.
إتصلت بيهم وشرحت فى التليفون المشكلة لقيت اللى بيكلمنى فى وادى تانى ومش عايز يفهم فأصريت إنى أعمل شكوى فعمللى الشكوى وقاللى فيه حد حيتصل بيك فى خلال أيام. إنتظرت أسبوع وماحدش عبرنى إتصلت تانى وإشتكيت بحدة واللى رد عليا قاللى تانى فيه حد حيتصل بيك. وأخيرا واحدة ليدى من فودافون كلمتنى بعحها بيومين. ولما رديت عليها قالتلى إنت كنت بتشتكى من الفاتورة قلتلها أيوة وشرحتلها المشكلة فردت عليا رد قاطع : إحنا راجعنا الفاتورة ولقينا إن مافيش مشكلة. قلتلها المسابقات واﻷخبار: قالتلى ممكن تكون إشتركت فيها من غير ما تقصد. قلتلها طيب إلغيها، المهم دلوقتى المشكلة الكوميدية بتاعة اﻹنترنت، قالتلى : برضه راجعناها ومالقيناش حاجة وهى كده صح. قولتلها ياستى بالعقل كده، إزاى حاعمل كل ده فى ثانية ، ردت عليا بتناكة وقالتلى تلاقيك بتدخل من سايت لسايت وإنت وش واخد بالك (وشعرت ساعتها إنى مسطول وبريالة) قلتلها ياستى فنيا وتقنيا علميا وعمليا ماينفعش أعمل داونلود ل300 ميجا فى ثانية واحدة على تليفون قديم بدون GPRS وإنتم كاتبين 3G قالتلى هو كده مظبوط.
قفلت السكة ورحت الفرع اللى فى روكسى ودخلت وإنتظرت الدور وضيعت وقت ولما جه دورى ورحت للموظفة سابتنى أشرح المشكلة لﻵخر وبعد ما خلصت قالتلى “إحنا مالناش دعوة بالحاجات دى، ولازم تكلم خدمة العملاء” خرجت من الفرع ورميت الشريحة فى الزبالة.
وطبعا مادفعتش حاجة وقعدوا فترة كل تلات شهور ألاقى حد من الشركات اﻷى بيأجروها للتحصيل يكلمنى ويقوللى إنه محامى وإنهم رافعين عليا قضية وحاتسجن ﻷنى مش عايز أدفع ال 600 جنيه. وطبعا برد عليه بأن فودافون شركة نصابة وعندى دليل إنهم نصابين وأقفل السكة.
أنا مش فاهم الناس اللى عندها فودافون بتتعامل معاها إزاى. الشبكة بتاعتها مش قد كده واﻹنترنت عندهم زبالة وأغلى من الشركات التانية. نسيت أقوللكم إنى كان عندى USBفودافون وكانت منيلة مقارنة بال USB بتاع موبينيل أو إتصالات.
المشكلة دى كانت فى 2010 وفضلوا يكلمونى لغاية نص 2011 وبعدين زهقوا. وعموما، أنا لا أرشح فودافون ﻷى شخص على اﻹطلاق وباللغة العامية – شركة نصابة
وبالمناسبة أنا لقيت الموقع ده (بالصدفه والله) عن الناس اللى بتكره فودافون مصر: http://ihatevodafoneegypt.com/
زيــــــدان اون لايــــــــن 
I hear you ..
By: hateVodafoneEG (@hateVodafoneEG) on 04/09/2012
at 4:51 مساءً
انا عندي نفس المشكله معاهم مع فارق اني اساسا ماشتركتش في نظام الفاتوره ولاقيتهم طالبين مني ٢٢٥جنيه وحصل معايا نفس الاحداث ووقفوا الخط من سنه ورجعوا يكلموني تاني انهم هيرجعوا للقضاء كنت عايزه اسال حضرتك هل فعلا بيكملوا قضيه ولا هو تهديد وخلاص
By: مروه عامر on 07/11/2016
at 6:14 مساءً
تهديد وخلاص. وخلى بالك اللى بيتصل بيكى ما بيكونش موظف فودافون، دول بيبقو شركات تحصيل متأجرة وهم بيعملو الشويتين دول علشان بياخدو عمولة على التحصيل. وعلى فكرة برضه بتوع التحصيل دول مالهمش اى سلطة، يعنى حيقولك مثلا احكيلى المشكلة وانا ححاول احلها وكده. كله فى البتنجان.
By: Zedan on 07/11/2016
at 7:27 مساءً
انا كمان نفس المشكلة والشركة من 2009 وبيتصلوا بيه بعد 9 سنين وبيقولولي غليك فاتورة والله ما عارف ايه التهريج دع ومرة واحد يكلمني ومرة ليدي تكلمني وقلت لهم خدمة النت زي الزفت وبلغتكم بكده وقفلت اليواس بي ده ومستفدتش بيه خااااااااااااااااالص وجايين بعد 9 سنين تكلموني. حسيي الله ونعم الوكيل
By: moham on 13/04/2018
at 5:30 صباحًا
عندى نفس المشكلة بس انا الخط وقع وبلغت وهمة مهتموش ودلوقتى طلبين مبلغ 4000 الف جنية قولتبهم نتقبل فى المحكمة وقفلت السكة وكلمت خدمة العملاء بيقوليلى ان الخط موقعش ولا حاجة وحتة لو وقع مش زنبهم انى معملتش استرجاع لى الشريحة بس كل شهرين يكلمونى الموضوع انى انفضلهم ولا هيرفعو قضية فعلا ارجو الأفادة
By: محمد on 10/03/2019
at 7:22 مساءً
مشكلتى معاهم دى كانت فى ٢٠١٠ وكان المبلغ على ما اتذكر كان حوالى ٧٠٠ جنية، وطبعا اكيد مش حتيكلفو قضية ومتابعة علشان ٧٠٠ جنية ، طبعا ٧٠٠ جنية ايامها ممكن تساوى ال ٤٠٠٠ دلوقتى. انا بصراحة شايف ان طالما انت متأكد انهم طالبين مبالغ بدون استهلاك يبقى تثبت على موقفك. وعلى فكرة هم بيخوفو الناس بكلمة قضية دى، وحتى لو قضية واتحكم ان ليهم فلوس حاجة عادية جدا مش قضية سرقة مثلا.
By: Zedan on 11/03/2019
at 12:31 صباحًا
وبعدين انتا مش ماضي ع حاجه
By: نادر on 15/09/2019
at 7:23 مساءً
ممكن اعرف حضرتك وصلت لاي دلوقتي؟
By: فارس محمد on 27/01/2022
at 10:39 صباحًا
الكلام دا كان من عشر سنوات. وماعملوش حاجة.
المشكلة بس لما حبيت اجيب خط كارت جديد من عندهم السيستم كان قافل انى اخد اى خط جديد
By: Zedan on 05/02/2022
at 10:03 صباحًا
اسف كنت بجيب خط بفاتورة للشغل ، والسيستم مارضيش. لكن الخط الكارت كان عادى
By: Zedan on 05/02/2022
at 10:05 صباحًا
السلام عليكم
حضرتك انا كنت شارى خط باسمى لواحد صحبى فودافون ريد من 2016 فوجئت ان المحامى اتصل بي وبقولى ان حضرتك عليك 500 جنية رسوم اشتراكات ثلاث شهور من 2016 على الخط وان الشركة هتقضيك وهترفع تعويض وانا شايف ان المبلغ مش مستاهل للقضايا قولتلة انت جى من شهر 2 لسنة 2016 تقولى دلوقت قالى برحتك انت اللى خسران مش انا وافضلك الحل الودى
ارجوكم ايه الحل واعمل ايه وهل فى تقادم بمضى المدة
By: ɱŏĥặɱěd Țặĥặ on 23/06/2019
at 2:05 مساءً
نفس المشكله معايا فوجئت تقريبا بنفس الليدي بتكلمني ان في خط باسمي عليه 3000 جنيه من 2010 وهي بتؤكدلي انها من شؤون قانونيه وممكن تخفضلي المبلغ 1000 جنيه او هاخد حكم غيابي ولو مش مصدق روح الفرع المهم رحت الفرع وسألت لقيتهم بياكدوا الكلام طيب يا جماعه الخط ده مش بتاعي ومعرفش حاجه عن الرقم ده اصلا ولوهوه فاتوره فين نسخه العقد وامضائي عليها ولو كلامكم صحيح ازاي افتكرتوا بعد 10سنين وازاي سمحتولي اشتري منكم خطوط تانيه خلال المده اللي فاتت و اعمل عليها فودافون كاش والمفروض اني عميل بلاكليست عندكم ؟؟ ولا حياه لمن تنادي ومش عارف هل ممكن تتحول قضيه ؟؟؟
By: OT tamimi on 23/12/2019
at 6:10 مساءً