التعبير ده شغل بالى من فترة. ساعات لما بتقعد مع واحد صاحبك مثلاً وتجيبوا سيرة حد تعرفوه يقوللك: سيبك منه ده دماغه تاعباه. فياترى إيه معنى دماغه تاعباه. قعد أفكر كده هو مين اللى الناس بتعتبره إن دماغه تاعباه؟ هل لأن مستوى تفكيره أقل وعنده أراء متطرفه أو غبية بمعنى أصح … وللا دماغه عاليه ومستوى ذكاؤه أعلى من اللى حواليه فبالتالى دماغه تاعباه لإنها بتفكر كتير؟؟!!
الحقيقة إكتشفت إن الإثنين دماغهم تاعباهم لكن الأول مش عارف إن دماغة تاعباه والتانى عارف بس مضطر. فالأولانى (اللى هو غبى) تفكيره أقل من المستوى الأدنى المطلوب علشان يعرف يعمل اللى هو عايزة وأكيد بيخسر كتير لأن ماعندوش حاجة تساعده على التميز إذا كان عنده طموح ، فبالتالى أهو عايش وخلاص وحاسس إن هى الدنيا كده، وتلاقيه ماشى مع الناس زى القطيع، والحقيقة فيه حاجات كتير مابيعرفهاش وبتفوته والشخص الطبيعى أكيد حيكون زعلان لكن فى حالة الراجل التعبان ده هو أصلاً مش عارف فبالتالى هو مستريح وحاسس إن الدنيا أخرها كده.
النوع التانى من الناس اللى دماغها تاعباهم هو الذكى بزيادة أو مثقف بزيادة أو مطلع على حاجات أكتر أو ثقافات فى بلاد تانية. بيكون شايف إن الدنيا لازم تكون بشكل معين أو مستوى معين وبيفترض فى الناس إن رد فعلها أو إستجابتها لأمر ما هو نفس إستجابته لنفس الأمر، لكنه بيكتشف العكس وبيكون شايف إن الناس ماشية غلط والمفروض يصلحها ويقنعها، وبالمقابل الناس بتشوفه مختلف وعايز يعمل حاجات غريبة أو رأيه مختلف عن الطبيعى (أو مجنون من وجهة نظرهم). هو ده بقى اللى بيبقى تعبان فى حياته والسبب فى تعبه هى دماغه.
ياترى إنت شايف نفسك من أى نوع؟ قبل ماتجاوب أحب أقوللك إن أكيد كل الناس شايفه نفسها من النوع التانى حتى لو مش كده. والسبب إن كل واحد مابيديش نفسه فرصة أنه يسمع رأى الناس فيه وفى نفس الوقت بيدى لنفسه كل الحق فى إبداء رأيه فى الآخرين.
وفى الآخر كلنا تعبانين
زيــــــدان اون لايــــــــن 
أترك تعليقـك هنا